تجديد واستخراج رخصة القيادة

فى السطور التالية سنقدم لكم شروط وتكاليف تجديد واستخراج رخصة القيادة الخاصة والمهنية أو قيادة دراجة نارية فى مصر ، والتى يبحث عنها الآلاف من الناس ، بالخطوات والتفصيل الشامل الكامل من الألف إلى الياء.

تجديد واستخراج رخصة القيادة

⏪ عزيزى القارئ ... ، جهز نفسك ... واعملك فنجان قهوة ، أو كوباية شاى ... ، وسأكون فى انتظارك بعد عودتك ... ، لأنك ستتلقى صدمات كثيرة ... ومفااجآت من العيار الثقيل جدًا ... فكن مستعدًا !!

⏪ بص يا سيدى .. فى البداية .. كل شخص يريد الحصول على رخصة قيادة خاصة أو قيادة دراجة نارية ... عليه أن يتقدم إلى وحدة المرور التابع لها محل إقامته الحالى المكتوب فى بطاقة الرقم القومى أو جواز السفر أو فى بطاقة تحقيق الشخصية لرجال القوات المسلحة.

⏪ استخراج رخصة القيادة :

(1) شروط استخراج رخصة قيادة خاصة للمرة الأولى :

يكون طالب الرخصة حاصلاً على شهادة إتمام مرحلة دراسية أو حاصلاً على شهادة محو الأمية الصادرة من الهيئة العامة لمحو الأمية وتعليم الكبار.
عدد 6 صور شخصية ( يفضل مقاس 4 × 6).
لا يقل سن طالب الرخصة عن 18 سنة ولو بيوم واحد.
تقديم عدد 2 شهادة طبية إحداهما للباطنة والأخرى للرمد ( أصبحت الآن عيادة الباطنة وعيادة الرمد داخل وحدة المرور).
بعد أن تجتاز بنجاح اختبار المرور العملى أمام لجنة الاختبار ( تفادى الأقماع) + اختبار الشفوى فى قواعد وآداب وعلامات وإشارات المرور.
هتشترى من وحدة المرور ملف ورق بـ 30 جنيه.
وهتشترى معاه حافظة بلاستيك بـ 60 جنيه !!
هتشترى نموذج اختبار الكمبيوتر.
بعد كده هتاخد رقم من بوابة وحدة المرور.. وهتستنى دورك.
لما ييجى دورك هتروح للشباك وطبعًا معاك الملف والحافظة البلاستيك أم 60 جنيه والصور والشهادات وصور بطاقة الرقم القومى (2 صورة) - والموظف هيشيك على الملف بتاعك.
هتاخد ورقة من هذا الموظف بها أرقام .. وهتروح تدفع قيمة الكشف الطبى (داخل وحدة المرور - باطنة + رمد).
خد عندك المفاجأة والصدمة الأولى .. هتدفع بالصلاة على النبى مبلغ الكشف الطبى للباطنة والرمد وقيمته 935 جنيه أيوه 935 جنيه إذا كنت من سكان أى محافظة داخل جمهورية مصر العربية ما عدا سكان محافظة الجيزة ... ، استنى وخد عندك كمان ... إذا كنت من سكان محافظة الجيزة فأنت مغضوب عليك وأصابتك لعنة الفراعنة وهتدفع للكشف الطبى الباطنة + الرمد مبلغ 1685 جنيه أى والله هتدفع مبلغ 1685 جنيه ده ممكن لأنك من سكان الجيزة ... وطبعًا عندك يا سيدى الأهرامات الثلاثة اللى هى من عجائب الدنيا السبع !! ... أنا سمعك بتقول .. " حسبنا الله ونعم الوكيل ".
بعد كده هتدخل إلى غرفة التصوير .. وابسط يا عم هتدلع قوى صورتك هتكون بالألوان كمان ده ببلاش !!
وهترجع تانى للكشف الطبى : هتدخل أولاً غرفة الباطنة ... وهتعمل تحليل دم بشكة دبوس فقط .. أو لو كنت عارف فصيلة دمك قولها للدكتور ومش هتحلل دم.
فى نفس غرفة الباطنة هتقف أمام الدكتور وهيطلب منك تمد ذراعيك للأمام ، مع تطبيق وتحريك أصابع كل يد ، ثم ترفع ذراعيك لأعلى .. ، ثم هتقف على رجل واحدة مع التبديل .. ، ومفيش كشف باطنة ولا حاجة !!
بعد كده هتدخل غرفة الرمد .. ، وهيطلب الدكتور منك أن تضع يدك على عينك اليسرى وتنظر إلى علامات اختبار النظر .. ، وطبعًا بعد كده العين اليمنى.
هتروح مرة تانية للموظف اللى استلم منك الملف .. وطبعًا هيبصلك وهيقولك ... أنا وفرت عليك تعب كتيير وإجراءات .. شكله عايز إيه الله أعلم ؟؟!!
وهيديك ورقة تشترى بيها نموذج اسمه 110 وهو تمنه بـ 110 جنيه.
هترجع تانى للموظف وهيديك ورقة جديدة علشان تروح لشباك الخزينة وتدفع الضريبة المقررة.
وبعيدين هترجع للموظف وتسلمه الإيصال + النموذج.
بعد كده هتستنى أمام غرفة التصوير للحصول على الرخصة بتاعتك اللى فيها صورتك بالألوان .. ، ومتنساش تستلم بطاقتك مع استلام الرخصة.
هترجع بيتك بالسلامة إن شاء الله.
وبسرعة هتدخل تاخد دش بارد جميل ... وانت مش مصدق إنك حصلت على الرخصة.
بكده هتكون انتهت رحلتك وحكايتك المريرة طبعًا مع استخراج رخصة القيادة الخاصة بتاعتك.
وبالصلاة على النبى ... هتمسك موبايلك وتحسب مصاريفك اللى هتكون حوالى 2500 جنيه إذا كنت من سكان أى محافظة داخل جمهورية مصر العربية ، أما إذا كنت من سكان محافظة الجيزة فقط ستصيبك لعنة الفراعنة وهتكون صرفت حوالى 3500 جنيه !!

*********************

⏪ تجديد رخصة القيادة :

(2) إجراءات تجديد رخصة القيادة الخاصة :

أول حاجة هتجيب شهادة مخالفات من نيابة المرور بـ 20 جنيه ، ده لو ما فيش عليك مخالفات طبعًا.
بعد كده هتروح وحدة المرور وهتجيب شهادة بيانات .. وهتحتاج تجيب ملف ورق بـ 35 جنيه + هتدفع للخزينة مبلغ 70 جنيه + عدد 2 صورة شخصية لك.
وبعدين لازم هتروح وحدة المرور التابعة لعنوان إقامتك والموجود فى بطاقة الرقم القومى.
من وحدة المرور هتشترى ملف ورق بـ 30 جنيه + حافظة بـ 60 جنيه !!
وبعدين هتاخد رقم لحجز دورك على الشباك.
جمد قلبك لما ييجى دورك .. ، وروح للشباك وقدم للموظف الملف + الحافظة + شهادة البيانات + عدد 2 صورة بطاقة رقم قومى + 2 صورة الرخصة بتاعتك القديمة .. والموظف هيشيك على كل حاجة.
لو كان حظك وحش .. ، هيقولك الموظف : يا أستاذ لسه التحويل بتاعك ما جاش !! ، هتقوله مش فاهم .. هيقولك ببساطة .. هتروح تانى وحدة المرور اللى عملت فيها شهادة البيانات وهتجيب ورقة التحويل !!
يا سلام لو كنت مثلاً من مرور أكتوبر إلى مرور الدقى .. ، هتدفع مع مشوارك مبلغ 450 جنيه قيمة التحويل .. ولازم تقول فى سرك : " لا حول ولا قوة إلا بالله " !!
أما إذا كانت شهادة البيانات بتاعتك من وحدة أقرب هتجيب نموذج اسمه 110 وهو فعلاً بـ 110 جنيه !!
وهترجع تانى لنفس الموظف .. ، هيبصلك وهيضحك وهيقولك أنا كده وفرت عليك تعب كتيير وإجراءات ... شكله عايز إيه الله أعلم ؟؟!!
وبعدين هيديلك ورقة هتروح بيها للكشف الطبى (داخل وحدة المرور).
وتقف أمام الشباك لتدفع مصاريف الكشف الطبى (الباطنة + الرمد).
استعد لتتلقى الصدمة الأولى وأكبر المفااجآت هضرتك كده بالصلاة على النبى هتدفع مبلغ 935 جنيه ده إذا كنت من أى سكان محافظة داخل جمهورية مصر العربية ما عدا محافظة الجيزة ، أما إذا كنت من سكان محافظة الجيزة فأنت مغضوب عليك وأصابتك لعنة الفراعنة وهتدفع مبلغ 1685 جنيه أى والله هتدفع 1685 جنيه ده ممكن لأنك من سكان الجيزة ... وطبعًا عندك يا سيدى الأهرامات اللى هى من عجائب الدنيا السبع !! أنا سامعك بتقول : " حسبنا الله ونعم الوكيل ".
بعد كده .. هتروح تتصور فى غرفة التصوير ببلاش !! وكمان ابسط ياعم هتدلع وهتكون صورتك بالألوان كمان.
هترجع بعد كده للكشف الطبى (داخل وحدة المرور) .. وهتدخل الأول غرفة كشف الباطنة .. هيطلب منك الدكتور صباعك لشكة الدبوس وتحليل الدم .. ، وإذا كنت عارف فصيلة دمك قولها ومش هتتشك بالدبوس .. ، فى نفس الغرفة الصغيرة هيطلب منك الدكتور أن تمد ذراعيك إلى الأمام ثم ترفعها إلى أعلى ، مع ضم أصابع كل يد على حدة .. ، ثم تقف على رجل واحدة ، مع التبديل .. ومفيش كشف باطنة ولا حاجة !!
وبعدين هتدخل غرفة الرمد ، وهيطلب منك الدكتور أن تضع يدك على عينك اليسرى وتبص إلى لوحة إشارات كشف النظر ، ثم تبدك لعينك الأخرى.
هترجع بعد الكشف الطبى للموظف .. ، وما شاء الله هيدلك ورقة جديدة علشان تروح وتدفع الضريبة المقررة للخزينة مبلغ 610 جنيه.
وهترجع لنفس الموظف وهتديله إيصال الدفع + ورقة النموذج.
بعد كده هتروح ، وتستنى أمام غرفة التصوير لاستلام رخصتك بالسلامة.
هتستلم الرخصة الجديدة .. ، وما تنساش تاخد بطاقتك معاها.
هترجع بيتك .. ، وهتدخل تاخد دش بارد جدًا !!
بعد كده هتمسك الرخصة الجديدة ، وهتفتح موبايلك ، وهتحسب مصاريفك لاستخراج الرخصة .. وهتكون حوالى 1700 جنيه إذا كنت من سكان أى محافظة داخل مصر عدا محافظة الجيزة .. ، أما إذا كنت من سكان محافظة الجيزة فأنت مغضوب عليك وأصابتك لعنة الفراعنة وهتكون مصاريف الرخصة بالصلاة على النبى حوالى 2600 جنيه .. ، وده طبعًا علشان يا سيدى عندك الأهرامات اللى هى من عجائب الدنيا السبع !! ... أنا سامعك بتقول " حسبنا الله ونعم الوكيل ".

********************